2030 жылға қарай суармалы жерлердің ауданы 300 мың гектарға дейін жеткізілмек, деп хабарлайды @Pavlodarnews.kz тілшісі.
Бұл туралы Өңірлік коммуникациялар қызметінде өткен баспасөз конференциясында павлодар облысының жер қатынастары басқармасының басшысы Мұрат Хамитов мәлім етті.
– Суармалы жерлер көлемін ұлғайту жөніндегі жол картасын іске асыру шеңберінде облыста 2030 жылға қарай суармалы жерлердің ауданын 300 мың гектарға дейін жеткізу жоспарлануда. Облыстағы суармалы егістік жер көлемі 161 мың гектарды құрайды. Бұл жерлер Ертіс пен Сәтбаев каналының бойында шоғырланған, – дейді Мұрат Хамитов.
Спикердің айтуынша, жергілікті фермерлер тамшылатып суару әдісін пайдаланады, жаңбырлатып суаруды сирек орнатады. Шарбақты ауданының шаруа қожалықтары суару үшін жер асты суларын пайдаланады.
– Павлодар облысына шамамен миллиард текше метр су бөлінді, бірақ әзірге облыс бұл көлемнің жартысын ғана пайдаланады, – деді спикер. – Сәтбаев атындағы арна 30 пайызға жүктелген, ал егер жүктемені тағы 30 пайызға арттырсақ, бұл канал бойындағы суармалы жерлердің ауданын 14,5 мыңнан 30 мың гектарға дейін жеткізуге көмектеседі, – дейді Мұрат Хамитов.
Еске сала кетейік, Павлодар ауданында құрғақшылық салдарынан ең көп зардап шеккен – Май және Аққулы аудандары. Аталмыш аудандарда су деңгейі тек 15 пайызға көбейсе, Павлодар ауданында 35 пайызға, ал Железин мен Ақтоғай аудандарында 60 пайызға дейін көтерілген.
