Пікірталас алаңында қоғамдық кеңестердің төрағалары мен түрлі деңгейдегі мәслихаттың хатшылары бас қосты, деп хабарлайды @Pavlodarnews.kz. Аталмыш шараны павлодар облыстық ақпарат және қоғамдық даму басқармасы Мемлекеттік басқару академиясының жергілікті филиалымен бірлесе отырып ұйымдастырды.
- «Қоғамдық кеңестер мен мәслихаттардың Павлодар облысының дамуы жоспарын жүзеге асырудағы рөлі» атты брейнсторминг форматындағы жиын өңірдің әлеуметтік-экономикалық дамуына қатысты сындарлы ұсыныстарды әзірлеу мақсатында өткізілді. Келелі басқосуға 40-тан астам қатысушы жиналып, топтық жұмыста тың идеяларын ортаға салды, - делінген хабарламада.
Айта кетерлігі, Мемлекет басшысы Қасым-Жомарт Тоқаев «Жаңа Қазақстан: жаңару мен жаңғыру жолы» атты халыққа Жолдауында қоғамдық институттардың рөліне баса назар аударған болатын. Осыны ескерген жиын қатысушылары қоғам мен билік арасындағы алтын көпірге айналып, ашықтық қағидатын қалыптастыру турасындағы ойларымен бөлісті.
Командалық пікірталасқа қатысты өз ойымен облыс әкімінің орынбасары Айзада Құрманова да бөлісті. Оның айтуынша, саяси, экономикалық бәсекелестіктің дамуы елдің жаңаруының бірден-бір жолы болып табылады. Шара қатысушыларының пікірі де осыған саяды. Ендігі кезекте, мемлекеттік органдар қоғам өкілдерімен бұл бастаманы бірлесе жандандырып, өңір тұрғындарын ашық талқылауларға тартудың әдіс-тәсілдерін қарастырмақ.
