Сот шешімін елемегені үшін ер адам 72 мың теңге төлейтін болады, деп хабарлайды @Pavlodarnews.kz.
павлодар қаласының әкімшілік құқық бұзушылық жөніндегі мамандандырылған сотында ӘҚБтК-нің 669-бабы 1-бөлігі (Сот үкiмiн, сот шешiмiн немесе өзге де сот актiсiн және атқарушылық құжатты орындамау) бойынша «MG» ЖШС-не қатысты іс қаралды.
Биылғы жылдың 14 сәуірде қалалық әкімшілік құқық бұзушылықтар жөніндегі мамандандырылған сотының қаулысымен заңсыз салынып жатқан құрылысты мәжбүрлі түрде бұзу туралы шешім шығарылып, «MG» ЖШС әкімшілік жауапкершілікке тартылған болатын.
Құрылыс компаниясына қатысты атқарушылық іс қозғалған, дегенмен ЖШС жауапкершілік туралы жазбаша ескертуге қарамастан, атқарушылық құжатты орындамаған.
– Сот отырысында «MG» ЖШС өкілі кінәсін толық мойындады. ӘҚБтК-нің 669-бабының 1-бөлігі бойынша «MG» ЖШС кінәлі деп танылды. Ол мемлекет кірісіне 72 450 теңге мөлшерінде айыппұл төлеу керек. Үкім заңды күшіне енген жоқ, – деп жазылған әкімшілік соттың баспасөз релизінде.
Еске сала кетейік, 2023 жылдың сәуір айында құрылыс салушы М. Горький көшесі, 46 мекенжайы бойынша 93,2 шаршы метр жерде бес қабатты тұрғын үйді салмақ болған. Бұл ретте аталған жер телімі жеке тұрғын үй салуға арналған еді. Алайда жобалық-сметалық құжаттаманың жоқтығына қарамастан, үш қабатты үй тұрғызылды. Павлодардың әкімшілік құқық бұзушылық жөніндегі мамандандырылған сотында ЖШС-ке қатысты әкімшілік іс қаралып, заңсыз салынып жатқан құрылысты мәжбүрлі түрде бұзу және мемлекет кірісіне 103 500 теңге сомасында айыппұл төлеу туралы шешім қабылданған болатын.
